صابنها

 قناة الملاعب حسمت الدوري واختارت من يمثل السودان افريقياً

• اعلنت قناة الملاعب من تلقاء نفسها ان الاتحاد العام لكرة القدم اعلن عن ممثليه في البطولات الإفريقية، (نحن يطرشنا من الكلام دا) – الناس ديل بجيبوا الكلام دا من وين؟ وقالت القناة من عندها (قطع اخضر) ان الاتحاد العام اعتمد ترتيب الدورة الاولى للممتاز ليمثل المريخ والهلال في بطولة الاندية الافريقية للإبطال كما اعتمد حسب ترتيب الاندية في الدورة الاولى حي الوادي نيالا والاهلي مروى ممثلين للسودان في بطولة الكونفدرالية.
• والله كلام.
• بقطعوا من رأسهم.
• بتجيبوا (الصنف) دا من وين انتوا؟
• موقع (باج نيوز) عشان المصدر واحد (نفس الشيء) (ونفس الزول) وزيتنا في بيتنا!! جاء فيه : (قرر مجلس اتحاد كرة القدم السوداني تمديد الموسم الحالي إلى الثلاثين من سبتمبر القادم جاء ذلك خلال اجتماعه “الأحد” برئاسة رئيس الاتحاد كمال شداد ، حيث قرر الاجتماع أن يُمثل أبطال الدورة الأولى للدوري الممتاز السودان على المستوى الأفريقي).
• دا كلام ما عندو أي اساس من الصحة.
• المشكلة الناس ديل وقت يقعوا في هذه الاخطاء – ما بعتذروا ولا بتراجعوا – بعملوا رايحين …زي كأنو ما في حاجة حصلت.
• الموضوع عادي.
• ولا حتى شوية (اعتذار).
• الملاعب اصلا ما فيها رجاء – لكن موقع (باج نيوز) مفروض يعتذر عن هذه الجلطة.
• انتوا فاكرين الناس نائمة؟
• فاكرين الناس ما جايبة خبر؟
• الكثير من المواقع الالكترونية والصفحات اخذت خبر قناة الملاعب واحتفلت بعض الصفحات بهذا الخبر كما فعلت صفحة فريق الاهلي مروى باعتبار ان الاهلي مروى سوف يمثل السودان في بطولة الكونفدرالية بحسب ترتيبه في الدورة الاولى للممتاز.
• القناة اعلنت عن الخبر قبل اجتماع اعضاء الاتحاد العام الذي ارجأ هذا الامر الى وقت لاحق.
• الحقيقة ان الاتحاد العام امامه عدد من الخيارات لاختيار من يمثلوا السودان في البطولات الافريقية.
• قناة الملاعب وبعض المواقع الالكترونية لمآرب لهم – حاولوا ان يضعوا الاتحاد في هذا المطب ليكون خبر قناة الملاعب هو قرار اعضاء اتحاد كرة القدم.
• عاوزين يمشّوا الاتحاد على مزاجهم.
• انتوا فاكرين الاتحاد بديره اسامة عطا المنان لغاية الآن.
• عاوزين تحددوا لأعضاء الجمعية العمومية لاتحاد الكرة اتجاهتهم.
• الموضوع لا يخلو من (خبث).
• عاوزين يطلعوا المريخ بطل للممتاز بالرجالة.
• ارادوا ان يمرروا (اجندتهم) ويخدموا بعض الاندية بهذا الخبر الذي جعل المريخ بطلا للممتاز ومنح حي الوادي والاهلي مروى بطاقة التمثيل في الكونفدرالية الى جانب الهلال الذي سوف يمثل في الابطال.
• التعامل مع الاخبار بهذه الطريقة يؤكد ان الكثير من المواقع الالكترونية والمنابر الرياضية تتعامل بدون مهنية وتعمل فقط من اجل ان تخدم اجندتها.
• الاخبار يجب ان تظل بعيدة عن هذه الالعاب واللا مهنية – يفترض ان يتم التعامل مع الاخبار بشيء من المهنية والامانة ، بدلا من ان تتجرد الكثير من المنابر من مصداقيتها بهذا الشكل.
• ابعدوا الاهواء والألوان الرياضية من منابر يفترض ان تكون (قومية) بدلا من (تلطيخها) بهذه الصورة التى تؤكد ان العمل في المؤسسات الاعلامية يمضى بعيدا عن المهنية.
• (البنشر التحليلي) لقناة الملاعب اقصد (الاستديو التحليلي) والذي سوف اطلق عليه اسم (البنشر التحليلي) لقناة الملاعب عشان بجيبوه لينا تحت رعاية (عرب) سات …وزيوت فوكس وزيوت ناشيونال وشركة جياد …وركشات الخندقاوي …تقول (منطقة صناعية)…(بنشر) بس …اصلو ما عندنا ليهم غير اسم (البنشر التحليلي)…تاني ما بريحو ليكم.
• ولا بفكوا.
• ببقى عندي ثابت.
• البنشر التحليلي لقناة الملاعب.
• ما شفتوا تلفزيون السودان نقل مباريات المنتخب كيف؟
• اتعلموا.
• استديو.
• وتحليل.
• واعادة.
• وتصوير زي الناس.
• تاني من اقول ليكم (البنشر التحليلي) لقناة الملاعب …اعرفوا طوالي اني قاصد الاستديو التحليلي لقناة الملاعب.
• ما بكرر ليكم الكلام تاني.
• افهموها براكم.
• لكن من وقت لاخر بديكم (لكزة) – عشان ما تنسوا.
• عشان تزكروا.
• انا اول مرة اشوف لي قناة بتنقل ليها (دوري) وهي بتشنف فيه وتقطع فيه بالصورة دي.
• انتوا عاوزين تجيبوا (اعلانات) و (رعايات) من وين ؟ اذا كانت هذه هي نظرتكم للدوري الممتاز.
• دي قناة (طاردة) للدوري الممتاز …وليس (ناقلة) له.
• ما عندكم (عقلية) استثمارية اصلو …ما في زول بعرض ليه (بضاعة) يقوم يشنف فيها بالصورة دي.
• انتوا لو عندكم رأي في الدوري الممتاز …ما تنقلوه.
• بتدفعوا (مليارات) للاتحاد ..ومليارات للنقل والتشغيل …وتبخسوا في البطولة الاولى في السودان بتلك الطريقة (السخيفة).
• احترموا المنافسة التى تنقلوها ..عشان المشاهد …والمعلن يجيكم.
• بدل ما تقعدوا تمسكوا ليكم في مواضيع هامشية وميتة …وتطلعوا من موضوع الكورة.
• عليكم الله في قناة ناقلة للدورى الممتاز …وهي الناقل الحصري له ..تقول في عضو من اتحاد الكرة اعتدي على احد العاملين في القناة بالعكاز.
• معقولة بس.
• الموضوع دا لو حصل مفروض تسكتوا عليه.
• ما حلو في حقكم.
• انتوا بتنقلوا في الدوري …ولا بتنقلوا في احداث رام الله.
• بتكرهوا في الناس يعني في الدوري.
• انتوا الخسرانين من الكلام.
• والله الكلام دا …بقولوا لمصلحتكم …عشان ما في معلن او راعي ممكن يجيكم بالطريقة دي.
• انتوا الخسرانين.
• بعدين الدوري الممتاز أي قناة بتتمناه.
• وانتوا دفعتوا فيه دم قلبكم.
• لو ما عندكم قدرة عليه …ما تقعدوا تبخسوا فيه بالصورة دي.
• يجيبوا ليكم مذيع عشان يقدم ليه استديو تحليلي او يعلق ليه على مباراة …اخلاقو في نخرتو.
• قرفان وزهجان.
• يعمل ليك الموضوع كلو (كهارب)…وارتفاع درجات الحرارة.
• اها ارتفاع درجات الحرارة دي من حمدوك؟
• من قحت.
• ما تعملوا لينا شغل (الكيزان) دا في قناة الملاعب.
• كفاية علينا محمد يوسف في قناة الهلال (طفل العالم الثالث)…كمان عاوزين تجيبوا لينا عثمان خلف الله.
• المشاهد ما عندو قضية بي حاجاتكم دي.
• متاعبكم.
• المعاناة التى يمكن ان تتعرضوا لها لنقل المباريات.
• الخلافات …والصراعات.
• ما بتخص المشاهد في حاجة.
• المشاهد تجيبوا ليه المباراة.
• وتنقلوها ليه بصورة محترمة.
• ما عاوزين فلسفة.
• وما عاوزين الحرب العالمية الثالثة في نقل المباريات.
• ما عندكم صبر.
• ما عندكم قدرة.
• الواطة سخنت عليكم.
• اتخارجوا.
• اعتذروا.
• الحاجات البتعملوا فيها دي تاني نحن ما بنسكت عليها.
• اذا كان الدوري الممتاز فيه مشكلة …فهي القناة الناقلة.
• قناة الملاعب ونبشرها التحليلي هو الذي اضعف الدوري الممتاز…وجعل اسهم الدوري تتراجع بسبب تلك الانتقادات التى تقدمها القناة لاتحاد الكورة …والقناة في نفسها قاعدة ساكت.
• نكرر ليكم الكلام الف مرة.
• ابقوا قدر المسؤولية.
• وقدر الدوري.
• الدوري الممتاز دا …نحن عاجبنا ..نحن سعداء به.
• بنستمتع بيه.
• هلال مريخ.
• هلال حي العرب.
• مريخ اهلي الخرطوم.
• هلال الفاشر هلال كادوقلي.
• كلو بنسعد بيه.
• كفاية انو بقدم لينا السودان كله.
• الخرطوم …وبورتسودان ونيالا وشندي والابيض والفاشر والقضارف وكادقلي وعطبرة ومروي.
• عاوزين شنو اكتر من كدا؟
• قوموا لفوا عليكم الله.
• جبتوا لينا الكلام.
• …………
متاريس
• في عناصر في المنتخب مفروض ما تلعب في المنتخب.
• ما تغشوا روحكم ساكت يا خالد بخيت.
• التنظير الكتير …ما كويس.
• كان من الاجدي ان يلعب المنتخب بتشكيلة جادة ..عشان يتقدم في التصنيف.
• الخسارة ممكن ترجعنا للخلف.
• خاصة ان المنتخب بحقق في ارقام قياسية.
• في داعي تجيبوا لينا هذه العناصر ..عشان تلعب باسم المنتخب.
• ما تلعبوا بالمنتخب يا خالد بخيت.
• دفعتوا ثمن التنظير الكتير.
• …………
• ترس اخير : تاني عاوز اقول شنو؟

مقالات ذات صلة

تعليق واحد

  1. مهاجمتك للقناة نابع من زعلك للتصنيف في التمثيل الخارجي وواضح انك مشجع ليس الا
    القناة بها بعض العيوب نعترف بذلك ولكن ليس لدرجة التمثيل بها بهذا الاسلوب الغريب
    عموما مادمت انت مدرب وناقد وصحفي وداخل في المنتخب اوضع لينا التشكيله والبلعب منو وطبعا كلهم من ناس الهلال
    مفروض تشجع لعيبة المنتخب وهذه الهزيمه من مباراة وديه تجريبيه تعرف يعني شنو تجريبيه يعني بشوفو امكانيات اللاعبين والحمد لله ادو مباراة كبيره وعليك تشجيعهم وليس ثبخيس مجودهم والتشكيك فيهم
    اتعلم قليل من الوطنيه وهم ابناء السودان جميعا

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى